یونس شاملی
بوگون شاهرخ زمانی تبریزین "وادی رحمت" قبریستانلیغیندا آعیله و دوستلاری ایله سون اولاراق ویدالاشدی و اورادا توپراغا وئریلدی.
یولوموز؛
شاهرخ زمانی، ایشچی آکتیویستی، 4 ایل بوندان اول ایران دئولتی نین گوونلیک اورقانلاری طرفیندن توتولوب و اوصولسوز بیر محکمه ده 11 ایل زیندانا محکوم اولور. بو ایشچی فعالی گئچن 4 ایلده آغیر باسقی و ایشکنجه لره معروض قالمیشدیر. گئچه هفته لرده شاهرخ زمانی نین غفلت لی اؤلومونون خبری مئدیادا یایلدی. شاهرخ زمانی نین آعیله سی اونون ساغلیغی حاقدا شاهرخ ون هئچ بیر خسته لیی اولمادیغینی ایدعا ائتدیلر. ائله بونا گؤره ده شاهرخ زمانی نین آعیله سی اونون یاریلما (اوتوپسی) راپورونو طلب ائدیر.
بوگون شاهرخ زمانی تبریزین "وادی رحمت" قبریستانلیغیندا آعیله و دوستلاری ایله سون اولاراق ویدالاشدی و اورادا توپراغا وئریلدی.
آمما تاسفلر اولسون کی شاهرخ زمانی نین دفن تؤره نینده اوتاندیریجی بیر اولای مئیدانا چیخدی و شاهرخ لا سون آن لاردا ویدالاشماق دیلی اونون آنا دیلی، تورکجه ده، یوخ، بلکه آزربایجانین مرکزی تبریزده او تؤره ن بیر بیگانه دیلده، فارس دیلینده، شاهرخ لا ویدالاشیلدی. دانیشان لار فارس دیلینده دانیشدیلار، اسلوقانلار فارس دیلینده وئریلدی، شاهرخ دان ویدا آنلاری، شاهرخ ون جانی ایله بیر اولان دیلی (تورکجه) کؤکوندن اونودولدو و فارس دیلی تبریزین "وادی رحمت" قبریستالیغین بورودو.
بو سؤزلر، فارس دیلینه قارشی سؤزلر دئیر. بلکه سورپریز ائدیچی بودور کی تورک تبریزده، تورک ایشچی فعالین دان ویدا ائتمک تؤره نینده، او فعالین دیلی، مدنیتی و کولتورو حئسابا گلمه مه سی، ایتیلیب – باتیلماسی سؤز قونوسو اولدو. بو آچی دان شاهرخ زمانی نین تؤره نینی اورقانیزه ائدنلر، اگرسه اؤزلری بو قرارآ گلمیشدیرلر و یا ایران رژیمی نین باسقیسی آلتیندا بو اوتاندیریجی حرکته ال قویموشدورلارسا دا قینانمالیدیر. شاهرخ زمانی نین دیلی، اونون آعیله سی و شهرینین دیلی، بوگون ویدالاشماق تؤره نینین دیلی اولمالی ایدی، فارس دیلی یوخ. البته کی فارس دیلینده فارس ایشچیلری طرفیندن بیانات اوخونماق هئچ ده عایب سایلمازایدی. آمما تؤره نین فارس دیلینده گئچیرمه سی، هر کیمسه نین طرفیندن اولورسا اولسون، بیر استعماری دوشونجه یه و سؤمورگه چی سیاسته باغلی بیر تشبوث ایدی. آزربایجان دا یاشایان خالقین دیلی عمومیتله تورکجه دیر و هر بیر تؤره ن، سمینار و یا یوروش (تظاهرات) عمومیتله تورک دیلینده گئچیریلمه لی دیر. عکس حالدا، یعنی آزربایجان دا هر بیر بهانه ایله فارس دیلین دن ایستفاده ائتمک، بیر آسیمیله ائتمک آلتی دن ایستفاده ائتمک دئمک دیر. اوقدر کی فارس توپلوموندا فارس دیلینده تؤره ن گئچیرمک نورمال سایلیر، تورک توپلوموندادا تورک دیلینده تؤره ن گئچیرمک نورمال حئساب اولونور. بو نورما قارشی دورانلار ایران دئولتی نین آسیمیله ائتمک سیاسیتی نین آلتی سایلمالیدیرلار.
بیر باشقا یؤن دن، شاهرخ زمانی نین ویدا تؤره نی نین فارس دیلینده گئچمه سی، آزربایجان دا، تورک خالقینا عایید سیاسی سول حرکاتی نین ضعیف اولماسین گؤسته رمک ده دیر. آدین چکدییم ضعف، موجود فارس سولونو آزربایجاندا گؤجلندیریر و ایشچی حرکاتی نی فارس دیلینده یؤنله شدیریر. آزربایجان/تورک سول حرکاتی نین گوجله نمه سی و ایشچی حرکاتی اؤز گوبه یین فارس سولچو حرکت ده کسمه سی، بو حرکاتین تورک دیل و ادبیات ساحه سینده یارادیجیلیق لاری و بو اساسدا ایشچی حرکاتینا آزربایجان دا صاحیب چیخماسی قاچینیلماز بیر یولدور.
بوگون، آزربایجان دا گئدن تورک میللی دئمکراتیک حرکاتی، آزربایجانی یؤنتمک (مدیریت ائتمک) اوچون گئنیش و دینامیک بیر باخیشا دایانمالی دیر. تورک/آزربایجان میللی دئمکراتیک حرکات، سیاسی یؤندن میللی دئمکراتیک حرکتی یؤنتمه لی، قادین حرکاتی آچیسیندان، تورک دیلینده قادینجیل دیل و ادبیات یارالتماسی و او اساسدا قادین حرکاتینی آزربایجانین بیر آیریلماز بؤلومو کیمی گؤرمه لیدیر و باشقا طرفدن ایشچی حرکاتینی تورک دیل و ادبیاتی ایله بسله مک و او ادبیات و دیل اساسیندا آزربایجانا مستقیل ایشچی حرکاتی نین یارالتماسینا چالیشمالیدیر. عکس حالدا فارس دیللی قادین و ایشچی تشکیلاتلاری، آزربایجان قادین لارین و ایشچی فعالارین اؤز چتیرلرینین آلتینا آلاجاقدیرلار و بو آزربایجان یمیزین گله جه یی اوچون هئچ ده اویقون دئیر.
20150915
آرتیرما:
شاهرخ زمانی نین وادی رحمت قبریستانلیغینداکی ویدا تؤرنین دن بیر کلیپ:
یولوموز؛
هیچ نظری موجود نیست:
ارسال یک نظر